Recipe para sa Bagabag I

Standard

Mga sangkap:

– Ikaw
– Alarm clock (mas maigi kung cellphone o smartphone)

Mga hakbang:
– Bago matulog, i-set ang alarm clock sa oras na kinakailangan mong magising kinabukasan. Kunwari, 6:00 ng umaga. O ‘di kaya’y 6:15—kasi sayang naman ang labinlimang minuto, tama?
– Matulog. Bahala ka kung paano. (Nakatutulong ang pagpikit ng mga mata, kung pilosopo ka.)
– Magising sa tunog ng iyong alarm clock. (O maging alerto sa tunog nito, kung hindi ka nakatulog. (Hindi ka siguro pumikit.)) ‘Wag munang bumangon.
– I-snooze ang alarm clock. Mga sampung minuto pa, kung nanaisin mo.
– Bago tumunog uli ang alarm, isipin ang araw na sasalubungin mo. Halimbawa, ang mga report mong hindi pa tapos. Meeting na dapat daluhan. Mga damit na kailangang labhan. Mga kaibigang iniiwasan, atbp.
– Sa pagtunog uli ng alarm clock, i-snooze lamang ito. Ipagpatuloy lamang din ang pag-iisip, maaaring laliman pa ito para sa mas mahusay na resulta—halimbawa, balikan ang huling limang taon ng iyong buhay.
– Sa pagtunog uli ng alarm clock, i-snooze lamang ito.
– Isipin: natutuwa ka ba sa sarili mo ngayon?
– Sa pagtunog uli ng alarm clock, i-snooze lamang ito.
– Pagnilayan: kung kakausapin ka ng batang ikaw, matutuwa kaya siya sa ‘yo?
– Sa pagtunog uli ng alarm clock, i-snooze lamang ito.
– Timbangin: kailan pa naging mailap ang iyong mga pangarap? Naaalala mo pa ba ang mga ito?
– Sa pagtunog uli ng alarm clock, i-snooze lamang ito
– Sa pagtunog uli ng alarm clock, i-snooze lamang ito
– Sa pagtunog uli ng alarm clock, i-snooze lamang ito
– Sa pagtunog uli ng alarm clock, i-snooze lamang ito
– Sa pagtunog uli ng alarm clock, i-snooze lamang ito
– Sa pagtunog uli ng alarm clock, i-snooze lamang ito

First Book of 2015: Every Day by David Levithan

Standard

There was this 2015 reading challege that I saw in Facebook. I reposted it and accepted the challenge, then just a few hours after I forgot about it. But lo and behold, I saw someone in my WordPress reader accepting this same challenge:

2015_reading_challenge

If you noticed, there’s already a marked entry: a book you started but never finished. And here comes my first book of 2015.

When I picked Every Day by David Levithan from my shelf, I wasn’t thinking about the challenge. What I really wanted was something simply worth reading. (I don’t want to plunge into the year’s regularity without finishing a book. Actually, I’ve been avoiding my phones just to savor this break.)

Every Day was a book I started about two years ago. A couple of chapters after, I decided that I wasn’t into the story and its characters. Now I’m glad I restarted reading it for I don’t even remember what was so distasteful about it when I dropped it before. And I guess it’s about the timing. There’s always a right book for the right time.

every day_coverThe story begins with a person who wakes up every morning in a different body, in a different life. Let the person be known as A. A has to deal with the inconsistency of waking up to different lives: lifestyle, friends, parents, routine, and many more. A’s fine with it, and yet when A falls in love with a girl, A tries to bend his/her limitations.

I’ll try not to spill some spoilers in this post, but I just have to say that I like how Levithan made its premise work. It took me a long time (years!) to erase my skepticism on its plot.

I like how the story stopped at the right moment, at the only just (yet heartbreaking) conclusion that there can ever be in A’s life. (But I do wonder if Levithan’s open about making a second book about A.) Also, it should be mentioned that the novel tests the flexibility of the reader’s perception towards gender and same sex relationships without being too imposing.

Finally, the novel implicitly communicates to the reader how one easily takes their days for granted in the eyes of someone who can’t hold on to things for any longer than a day (A). Maybe some days, you’d prefer being A and live different lives each day without the hassle of fulfilling promises and responsibilities, without the burden of long term relationships and tomorrow. But in the end, would that be a life worth living?

I thank myself for giving this book a second chance, more so, as my first book of 2015.🙂

Books of 2014

Standard

Manigong bagong taon! At kapag bagong taon, ano bang ginagawa? Let’s look back, shall we?🙂

Gusto ko itong nangyayaring kolektibong pagbabalik-tanaw tuwing pagpapalit ng taon, kasi ang ganda ng buhay kapag lagi mong tinitingnan “in hindsight”. Pagtanaw mula sa malayo, kumbaga. Pagtingin sa “bigger picture”, sa Ingles. Siyempre, nariyan ang automatic na year in review ng Facebook. Paglikom ng iba’t ibang larawan na inilagay sa Instagram para sa 2013. Pagsasalaysay ng mga highlights ng taon. Ganu’n. Maraming paraan, maraming avenue. Kay galing nito kasi lahat nalalagyan mo ng sense. Kahit ‘yung malulungkot na bagay, nagkakaroon ng silbi. ‘Yung kalungkutan, kasiyahan, kalabuan, galit, ‘di sinasadyang pagkakataon, mga pagkakamali, pagbuo ng mga ugnayan o pagkakaroon ng mga lamat dito–lahat ng mga ito napagdurugtong-dugtong natin para sa dalawang patutunguhan: ang ikaw na naririto ngayon at ang ikaw na ninanais mong makilala sa hinaharap.

Buhat din ng mga pagmumuning ito ang mga sumusunod na kataga: “Kaya pala…” o “Buti na lang…” o “Sana pala…” o “Sayang…” o “Sa susunod…”. Ganu’n kagaling ang utak ng tao. Sa isang napakaakademikong pananaw, isa itong self-evaluation at assessment. Sunggaban natin ang pagkakataong gamitin ang kakayahang ito.

Yaman din lamang na pinahahalagahan ko nang lubos ang pag-asa at pagbabagong kaakibat ng pagpapalit ng taon, makikisabay ako sa diwa nito sa pamamagitan ng pagbabahagi ng mga librong sumama sa akin nitong 2014. Medyo tradisyon na rin naman itong sinusubok kong ipagpatuloy taon-taon, higit pa dahil sa lahat ng bagay na nagbago sa akin nitong 2014–trabaho, career path/options, daily routine, lifestyle, pananaw, mga kaibigan, mundo, atbp.–pagbabasa ang isa sa kakaunting naging constant ng buhay ko.

Mayroon ka rin bang librong napusuan/napupusuan sa mga ito? :3

1. Strange Pilgrims. By Gabriel Garcia Marquez
Nagandahan ako nang lubos sa koleksiyong ito ni Gabriel Garcia Marquez. Ang ganda ng pagkakasulat, ang yaman ng materyal sa paraang hindi mo inakala–napakahapdi pati, partikular na sa mga kuwentong I Only Came to Use the Phone, Miss Forbe’s Summer of Happiness, at The Trail of Your Blood in the Snow. Sabay-sabay kong naramdaman dito ‘yung paghanga sa galing ni Marquez, kawalang ng pag-asa sa sarili kong panulat, at pagkakaroon ng pag-asang (baka) marami pang hindi nasusulat sa mundo.

2. Family Blessings. By LaVyrle Spencer
Contemporary omance novel itong matagal nang nabanggit sa akin ng Mama ko. Dalawa nga ang kopya namin nito sa bahay. Kung tipo mo ang romance novels o gusto mong sumubok magbasa sa genreng ito, puwede kang magsimula kay LaVyrle Spencer. Kung jaded ka rin tungkol sa forever, true love, o sa May-December love affair, para rin ito sa ‘yo.

3. Fangirl. By Rainbow Rowell
Ito ang unang nabasa ko kay Rowell. Tamang light reading, pero medyo hebigats sa feeling.

4. A Room with a View. By EM Forster
Dahil laging lumilitaw ang titulong ito tuwing mapag-uusapan ang mga nobela, sinubok ko itong basahin. Mananatili sanang maganda ang pananaw ko tungkol sa librong ito kung hindi ko lang nabasa ang synopsis ng sequel nitong A View without a Room.

5. Therese Raquin. By Emile Zola
Mayroon ako dating koleksiyon ng mga kuwento ni Zola, For a Night of Love. Naalala ko lang bigla at gusto ko sana ulit balikan, pero ipinangregalo ko nga pala sa isang kaibigan. Natiyempuhan ko itong Therese Raquin at hindi ako nagkamali sa pagpili rito. Mahirap lang basahin sa simula pero rewarding ang katapusan.

6. Married by Mistake. By Abby Gaines
May mga panahon lang talagang nati-tripan kong maghalungkat ng kung ano-anong libro sa bahay (madalas kapag stressed) at ang lagi kong napipili ay mga romance novels/pocketbooks. Ganu’n talaga, nitong 2014 tinanggap ko nang libro ang tulay ko sa pagtakas sa mga problema at angas ko sa buhay.

7. Trese: Stories from the Diabolical by Budjette Tan and KaJo Baldisimo
Masugid kaming tagapagsubaybay ng Trese rito sa bahay. Sa 2015, Tabi Po naman ang idadagdag namin sa mga dapat naming antabayanan.

8. The Bride and the Beast. By Teresa Medeiros
Isa itong historical romance novel na ang padron ay ang fairy tale na Beauty and the Beast. Maganda, pramis.

9. The River Knows. By Amanda Quick
Hindi ko masasabing maganda ang librong ito, tama lang na mystery-historical romance novel.

10. The Deed. By Lindsay Sands
Historical romance-comedy novel. Tipikal na sexist male protagonist na ibinangga sa isang strong female character, tapos yown o, unti-unting pagbabagong-hulma ng kanilang pagkatao para sa kanilang bagong tuklas na true love.

11. Flowers from the Storm. By Laura Kinsale
(Apat na sunod-sunod na romance novel ito, ibig sabihin malamang na may pinagdaraanan ako ng panahong ito haha!) Isa itong rekomendasyon ng malapit kong kaibigan, at masaya akong sinunod ko ang payo niya. Historical romance novel ito na kakaiba sa lahat ng mga romance novel na nabasa ko. Sinubok kong maghanap ng synopsis sa internet, pero wala akong nakitang pumapantay sa tunay na ganda ng librong ito. Ano ang tipikal sa nobelang ito? Babae at lalaki. Ordinaryong babae at mayamang duke/bahagi ng alta sociedad. Ekonomikal na pagkakaiba sa dalawang bida. Siyempre, may happy ending. Pero bakit ito naging kakaiba? Sa lahat ng romance novel na nabasa ko, ito lang ang naging matapang na maging lubos (as in, lubos!) na tapat sa wika ng panahong ginagalawan nila. Ito lang din ang sumusog sa isyu ng relihiyon sa konteksto ng pag-iibigan. Higit sa lahat, basta huhu.

12. Gone Girl. By Gillian Flynch
Aaminin ko, binasa ko ito kasi noong panahon ‘yon ay gagawin itong pelikula. Pero hanggang ngayon, ‘di ko pa rin napapanood ang adaptasyon (na napakaganda raw). Sa sobrang ganda ng kuwento, halos hindi ko na binitawan ang libro hanggang sa matapos akong magbasa.

13. Like Water for Chocolate. By Laura Esquivel
HIndi ko alam kung bakit, pero sadyang napakataas ng inasahan ko sa librong ito. Siguro kasi lagi ko itong nakikita sa mga bookstore. Pero, sa totoo lang, para akong nagbasa ng tekstong nagbabalatkayong One Hundred Years of Solitude.

14. Attachments. By Rainbow Rowell
Pangalawa ko itong Rowell. Dito ko napansing tila may kulang sa mga pagtatapos sa mga akda ni Rowell. Kung hindi bitin ang dating, kulang o minadali. Pero liban dito, maganda ang Attachments para sa akin.

15. The Art of Racing in the Rain. By Garth Stein
Noong panahong ito, hindi na ako nagtuturo. Nagpasa na ako ng mga resume sa iba’t ibang kompanya at naghihintay na lamang ng sasagot, tatawag, o kung ano man. Siyempre ano pa bang gagawin ko habang naghihintay? Naghalungkat ako sa laptop ko ng mga ebook na maaaring hindi ko pa nababasa (marami pa), at nakita ko ang The Art of Racing in the Rain. Biruin mo, POV ito ng aso sa loob ng isang pamilyang payak, pero ang lakas ng agos ng luha ko. Nanggaling dito ang linyang “That which you manifest is before you,” isa sa mga mantrang binabalikan ko tuwing nagne-nega ako sa buhay at sa sarili ko.

16. Written on the Body. By Jeanette Winterson Hirap na hirap akong basahin ito. Oo, may paglalaro at paninindigan sa flexibility ng gender dahil sa bidang (1st POV) hindi nagpapatukoy ng kasarian. Wala rin naman gaanong dahilan para malaman pa–hindi naman kasi iyon ang punto ng kuwento–pero ang utak pa minsan ang nagpupumilit na maglagay ng kahon sa bida. Napakasensuwal at erotik ng nobelang ito–napakadalas ihain ang katawan. Pero kung hindi ibinigay ang bayolohikal na kasarian ng bida, hanging dumarampi lang siya sa imahinasyon ng mambabasa (at least, iyon ang limitasyon ng isip ko noong panahong binasa ko ito).

17. Eleanor and Park. By Rainbow Rowell
Pangatlong Rowell book ko ito. Sa katunayan, hindi ko alam kung gusto ko ito o hindi. Nakakakilig, pero tulad ng naunang dalawang Rowell na binasa ko, may isyu uli ako sa paraan ng pagtatapos nito. Nandoon na naman ‘yung pakiramdam na minadali ang huling bahagi, nagkaroon pa ng ambiguity. Hihintayin ko pa ang pelikula (na si Rowell din ang nagsulat ng script) para maging malinaw ang pagtatapos.

18. The Collapse of What Separates Us. By Vincenz Serrano
Bakasyon, 20+ resumes ang ipinalipad ko pero walang bumalik kahit na solidong ebidensya ng rejection, insomnia. E ‘di magbasa ng mga tula. Kaya kong basahin mula cover page hanggang back page ang librong ito nang hindi ako nagsasawa (kahit na minsan, hindi ko naiiintindihan ang binabasa ko).

19. Ang Tundo Man May Langit Din. Ni Andres Cristobal Cruz
Uy, nakapagbasa rin ako ng classic nitong 2014. Para sa mga mahilig sa romance Wattpad stories, malamang papasa sa panlasa nila itong Ang Tundo Man May Langit Din. Akala ko puro isyung politikal at panlipunan ang laman nito, e grabe, nabato ko ba naman sa dingding ang unan ko dahil sa kilig.

20. The Last Little Blue Envelope. By Maureen Johnson
Tungkol ito sa misyon ng isang Amerikanang dalagita na sundin ang tagubilin ng kaniyang namayapang tiyahin: ang maglibot at makipagsapalaran sa Europe. Minsan din, ok palang ‘wag sundin ang kronolohikal na pagkakasunod-sunod ng mga nobela. ‘Di ko sinasadya pero nauna kong basahin ang sequel kaysa sa unang libro…

21. 13 Little Blue Envelopes. By Maureen Johnson
…at ito nga iyong naunang libro. Dahil sa dalawang nobelang ito, naglaro sa isip kong maghanap ng trabaho sa ibang bansa. At dahil choosy ako, sa Amsterdam. O basta sa Europe. Ang lakas lang kasing maka-trigger ng kagustuhang maglakbay ng mga librong ito. Tipong kung lalabas ka na lang din naman sa comfort zone mo, e itodo mo na. Lumabas ka ng bansa kung saan wala kang kakilala. Kung saan sarili mo lang ang pagkakatiwalaan mo, o wala kang magagawa kundi magtiwala sa iba. Umaasa pa rin akong makatitikim ako ng ganitong uri ng pakikipagsapalaran sa hinaharap.

22. The Fault in our Stars. By John Green
Napakatagaaaal na panahon bago ako naglakas-loob na basahin ang librong ito. Ang lakas kasi ng hype, pero sinasadya ko kasi talagang basahin muna ang libro bago panoorin ang bersiyong pelikula kaya hindi rin ako nakatakas. Napakapersonal sa akin ng kuwentong ito, tulad na lang din ng The Art of Racing in the Rain.

23. Flipped. By Wendelin Van Draanen Matapos ang maghapong pag-iyak dahi sa TFIOS, light reading naman ang hatid ng Flipped. Wala pa rin akong trabaho nang panahong ito kaya pinanood ko rin ang napakagandang adaptasyon nito.

24. History of Love. By Nicole Krauss Noong college student pa ako, may nagrekomenda sa akin ng A Lover’s Discourse ni Roland Barthes. Ang lagay, nakalimutan ko ang author (Barthes) at nang sinubok kong hanapin nitong bakasyon sa Google, History of Love ni Krauss ang lumabas. Wasak. Parang minamasa ang puso ko nang dahan-dahan habang binabasa ang librong ito. (Hanggang ngayon, hindi ko pa rin nababasa ang A Lover’s Discourse.)

25. Anne Frank: The Diary of a Young Girl. By Anne Frank Matagal na mula noong araw na binili ko ‘to, nakaplastik pa nga ito nang buksan ko nitong tag-araw. Bago ko ito basahin, wala lang sa akin si Anne Frank. Pero matapos kong basahin ang libro, ni hindi ko na matingnan ang larawan ni Frank. Sana umabot man lamang siyang buhay sa pagtatapos ng giyera. Sana, tulad ng iba pang mga inosenteng bata noon, hindi niya kinailangang mapagdaanan ang ganoong klaseng kalagayan. Sa kabila ng kaniyang kasikatan at napakalaking papel sa kasaysayan ngayon, isa lang talaga siyang dalagita noong hinahanap pa ang kabuuan ng kaniyang pagkatao. Nakakapangilabot iyong huling entry na wala nang sumunod, dahil wala na talagang susunod.

26. The Reluctant Heiress. By Eva Ibbotson
Hindi nakapapagod ulit-ulitin ang mga libro ni Eva Ibbotson, lalong-lalo na kung hanap ng imahinasyon mo ang mundo ng mga maharlika, pamumuhay sa lumang Europe, at mga pusong litong-lito sa pagtibok.

27. A Countess Below Stairs. By Eva Ibbotson
Gayundin sa librong ito, hindi nakakapagod ulit-ulitin. Plus points pa dahil Russian ang protagonist dito.

28. If I Stay. By Gayle Forman
Pumunta rito sa Pilipinas si Gayle Forman. Noong panahong iyon, kilala ko lang siya dahil nadadaan-daanan ko sa mga bookstore ang mga libro niya. Dahil sa pagpunta niya rito at sa balitang gagawing pelikula ang If I Stay, nakibasa na rin ako. Maganda! Lalo pa itong gumanda dahil sa…

29. Where She Went. By Gale Forman
…kasunod na librong ito. Sa Where She Went, punto de bista naman ito ng lalaking protagonist ilang taon matapos ang kuwento sa If I Stay. Lagi kong naikokonekta sa mga librong ito ang pelikulang August Rush, marahil dahil sa magkakaugnay nitong mga tema: musika, paghihiwalay at pagbabalikan, pag-ibig.

30. Harry Potter and the Philosopher’s Stone. By JK Rowling
Sa puntong ito ng taon, nakadalo na ako ng tatlong interview para sa isang trabaho (na trabaho ko pa rin hanggang ngayon, eksaktong 6 months na!). Pero bago ako opisyal na nakapagsimula, humingi muna ako ng isang linggong huling pahinga. Ginamit ko ang linggong iyon sa muling pagbabasa ng Harry Potter. Tamang-tama lang.

31. Harry Potter and the Chamber of Secrets. By JK Rowling

32. Harry Potter and the Prisoner of Azkaban. By JK Rowling

33. Harry Potter and the Goblet of Fire. By JK Rowling

34. Harry Potter and the Order of the Phoenix. By JK Rowling

35. Harry Potter and the Half-Blood Prince. By JK Rowling

36. Harry Potter and the Deathly Hallows. By JK Rowling
At natapos ko ang Harry Potter series reading marathon! Mahalaga sa akin ang Harry Potter hindi lang dahil sa mundo nito, pero dahil sa kuwento sa likod nito–ang kuwento ng pagbuo ni JK Rowling sa mga librong ito. Wala talagang silbi ang talento kung walang tiyaga na umaakay rito.

37. The House on the Beach. By Linda Barrett
Sa harap ng isang panibagong trabaho (LGU work)na ibang-iba sa pagtuturo, naharap na naman ako sa pagbabasa ng romance novels. Ang awkward lang ng pagkakasulat nito, pero maganda ang kuwento.

38. The Matchmakers. By Debby Macomber
Naintriga ako sa 3-in-1 Christmas-themed pocketbook na nadampot ko sa bahay. The Matchmakers ang unang-una sa tatlong novella. Hindi kapani-paniwala ang kuwentong pinuno ng cliche. Wala akong problema sa cliche at wala rin akong problema sa happy ending. Pero hindi pa rin kapani-paniwala ang kuwento.

39. Mrs. Scrooge. By Barbara Bretton
Sa tatlong novella, ito ang pinakagusto ko. Mahusay ang pagbuo ng mga tauhan, mahusay rin ang dahan-dahang paggapang ng kuwento tungo sa pangako nitong happy ending.

40. A Carol Christmas. By Muriel Jensen
Tama lang para sa akin ang nobelang ito, mas kapani-paniwala lang talaga ang Mrs. Scrooge.

41. French Silk. By Sandra Brown
Crime-Romance novel ito na mahusay rin ang pagkakasulat. (Ginawa pa raw itong pelikula para sa telebisyon.)

42. Isla and the Happy Ever After. By Stephanie Perkins
Noong isang taon, in love na in love ako sa mga nobela ni Perkins–Anna and the French Kiss at Lola and the Boy Next Door. Nitong 2014, inabangan ko ang pangatlong nobela sa kukumpleto sa serye ni Perkins, ang Isla and the Happy Ever After. Aaminin kong nananatiling paborito ko pa rin ang Anna and the French Kiss at hindi pumantay sa inaasahan ko ang Isla and the Happy Ever After. Gayunpaman, masaya pa rin at puno ng kilig at luha ang reading experience ko.

43. Anna Karenina. By Leo Tolstoy
Maniwala ka man o hindi, tatlong taon kong binuno ang librong ito! Para sa taong tulad kong sanay magbasa ng libro nang isang upuan lang, isang tunay na struggle ang humarap sa Anna Karenina. Siyempre, hindi ko ito kinayang matapos sa isang upuan lang. Maraming beses akong nag-iwan ng bookmark sa pagitan ng mga pahina nito at ilang buwan ang daraan bago ko ito muling balikan. Sa bago kong trabaho, mas marami akong oras para sa sa sarili ko. (Nilalakad ko lang ang pinagtatrabahuhan ko, kumpara sa halos apat na oras na commute noong sa Katipunan pa ako nagtatrabaho.) Kaya siguro nagkaroon ako ng lakas ng loob harapin muli ang Anna Karenina. Para sa akin, milestone ang matapos ang nobelang ito. Milestone ang sa wakas! Sa wakas, malaman ang kinahinatnan ni Anna Arkadyevna Karenina dahil sa pag-ibig, hinagpis, at dalamhati.

44. Atonement. By Ian McEwan
Kapag nagbabasa ako ng mga kuwentong may manunulat na tauhan, nag-a-alert bigla ang utak ko: it’s a trap! Tuso ang mga tauhang manunulat! Pero umasa akong hindi, maraming paraan para matapos ang kuwento nina Briony, Cecilia, at Robbie. Pero, wala e. Para akong sinampal nang dalawang beses sa huling dalawang pahina ng librong ‘to.

45. Landline. By Rainbow Rowell
Sa lahat ng mga gawa ni Rowell, ito ang pinakagusto ko. Mas gusto ko ang boses ni Rowell sa pagsusulat ng mga tauhang mature, kaysa young adult. Gustong-gusto ko rin kung paano siya magsulat at maglarawan ng emosyon. Sa lahat din ng mga libro niya, ito ang may pinakabuong pagtatapos. Hindi bitin at walang ambiguity. Kailangan mo nga lang ng matinding suspension of disbelief dahil sa isang napakanormal na mundo, mayroong landline na nakakonekta sa nakaraan at wala kang anumang paliwanag na makukuha.

46. If Love be Blind. By Emma Goldrik
Muli nakakita ako ng 3-in-1 pocketbook sa bahay. Ang tema naman nito ay mga tauhang bulag/impairment sa paningin (medyo nakakaloka pero challenging na premise, lalo na sa romance genre). Sa unang kuwento, nagkaroon ng marriage of convenience ang isang mayamang businessman at isa sa mga empleyado niya. Sa kabila ng kanilang set up at sa pansamantalang pagkabulag ng lalaki, nagkakaroon na ng atraksyon sa pagitan nilang dalawa. Hindi kapani-paniwala ang lahat ng ito, pero panalo ang humor kaya keri lang.

47. The Devil to Pay. By Jayne Ann Krentz
Bago ko pa natapos ang 3-in-1 pocketbook, may nadampot uli akong isang pocketbook. Crime-ish romance, hindi isa sa mga best ni Jayne Ann Krentz/Amanda Quick. Nakakaumay rin kasi talaga kapag sunod-sunod kang nagbasa ng romance. Pare-parehong padron, careless ang mga cliche, hindi buo ang mga pagkatao ng mga tauhan, etc. Kaya siguro nakakaadik para sa akin ang magbasa ng romance, lagi kong hinahanap kung may aangat na librong nakamit ang happy ending nang sinusunod ang padron ng genre pero magandang-maganda ang approach at pagkakasulat (Flowers from the Storm!)

48. When I See Your Face. By Connie Bennett
Pangalawa ito sa mga Romance novellang may bidang bulag. Mystery/crime-romance naman ito at napakainteresante. Maayos din ang pagkakasulat at build up ng mga eksena. Ang tanging disappointment ko lang, kailangan ba talagang bumalik ang paningin ng bidang babae para maging ganap ang pag-iibigan nila ng bidang lalaki? Parang nawala tuloy ang challenge ng premise…

49. Blind to Love. By Rebecca Winters
…na pinatunayan din ng huling novellang ito. Sa puntong ito, naumay na rin ako sa happy endings.

50. The Amazing Compendium of Edward Magorium as told to NE Bode. By NE Bode.
Binili ito ng kapatid ko sa kanilang book fair sa high school nila. Tungkol ito sa buhay at mga karanasan ni Edward Magorium, ang may-ari ng Edward Magorium’s Wonder Emporium. Nakasentro ang maikling librong ito sa paghahanap ni Edward Magorium ng kaniyang tunay na talento at lugar sa mundo. Napaka-timely ng pagkakabasa ko nito, dahil noong panahong ito ay gulong-gulo na rin ako sa buhay ko haha! Biruin mo ‘yun, children’s book ang nagbigay-liwanag sa akin.

51. Lord of the Flies. By William Goldling
Wasak. Mayroon kayang Philosophy of Morality classes na ito ang required reading?

52. Slaughterhouse-Five. By Kurt Vonnegut
Matagal-tagal ko ring iniwasan ang librong ito dahil ang lakas ng hype dito. Parang TFIOS o The Perks of being a Wallflower. Buti na lang, nakakuha ako ng libreng kopya at nagkaroon ng oras at pagkakataong mabasa ito. Hanggang ngayon, wala pa rin akong matibay na opinyon sa librong ito. Mahusay ang pagkakasulat, hindi mabigat ang approach pero ang unang-unang bumabagabag sa akin ay ang kawalan ng agency ni Billy Pilgrim. Sa katunayan, mas may kapangyarihan pa ang tagapagsalaysay kaysa kay Billy. Sa panimula ni Kurt Vonnegut, inihayag niyang malinaw na isa itong anti-war novel pero iniisip ko pa rin nang mabuti kung paano ito naging anti-war kung nagtapos ito sa ganoong paraan. Pero, at least, alam ko na kung saan nanggaling ang: Everything is beautiful and nothing hurts.

52 books, 1 year. Wala akong target na bilang ng libro para sa bagon taon, pero sana mas maging malawak pa ang saklaw ng aking pagbabasa–mula sa mga kilala ko nang may-akda, lokal na manunulat, mga antolohiya ng kuwento at tula, mga sanaysay, atbp. Cheers para sa isa uling taon ng pagbabasa!😀

Books of 2013

Standard

Heto na naman tayo. ‘Yung post na kada libro, nagiging kada taon na lang. Ni hindi ko nga natapos ‘yung araw-araw na tula para sa buwan ng Agosto. Ano namang excuse ko, ‘di ba? Siyempre, laging busy (yuck haha). Buti na lang, sa kabila ng pagiging busy ay ‘di ko naman binibitawan ang pagbabasa. Narito ang mga libro ko para sa taong 2013:

1. The Old Man and the Sea (Ernest Hemingway)

Special ito dahil unang libro ko ito ng taon, at para may extra: animated Old Man and the Sea.

2. Trese 1: Murder on Balete Drive (Budjette Tan & KaJo Baldisimo)
3. Trese 2: Unreported Murders
4. Trese 3: Mass Murders
5. Trese 4: Last Seen After Midnight
6. Trese 5: Midnight Tribunal
7. Batch ’97 Haiku (Angelo V. Suarez)
8. Sounder (William H. Armstrong)
9. Why We Broke Up (Daniel Handler & Maira Kaiman [art])
10. Before I Fall (Lauren Oliver)
11. Love Letters of Great Women (Ursula Doyle [editor])
12. Halinghing sa Hatinggabi (Mayette M. Bayuga)
13. Templo ni Tamilah (Mayette M. Bayuga)
14. A Mango-Shaped Space (Wendy Mass)
15. Sa Kasunod ng 909 (Edgar Samar)
16. Stargirl (Jerry Spinelli)
17. Requiem (Lauren Oliver)
18. What’s in your Heart (Ines Bautista-Yao)
19. Una & Miguel (Lilledeshan Bose)
20. Lihim ng San Esteban (Annette Flores Garcia)
21. Sa mga Kuko ng Liwanag (Edgardo Reyes)
22. Comic Stories about Love & Heartbreak (Elbert Or [editor])
23. The Library Card (Jerry Spinelli)
24. The Lover’s Dictionary (David Levithan)
25. A Nice, Quiet Place (F. Scott Fitzgerald)
26. Mga Gerilya sa Powell Street (Benjamin Pimentel)
27. Cloud Atlas (David Mitchell)
28. Ilustrado (Miguel Syjuco)
29. Pride and Prejudice (Jane Austen)
30. Shake, Shake Girl (The Stanford Graphic Novel Project 2008)
31. Si Crispin (Tony Perez)
32. Battle Royale (Konshun Takami)
33. Babaeng Misteryosa (Benjamin P. Pascual)
34. Anna and the French Kiss (Stephanie Perkins)
35. Struck by Lightning (Chris Colfer)
36. Lola and the Boy Next Door (Stephanie Perkins)
37. Bet Me (Jennifer Cruise)
38. Beautiful Disaster (Jamie McGuire)
39. James and the Giant Peach (Roald Dahl)

HIGHLIGHTS

  • Malaking discovery para sa 2013 ang mga graphic novel ng TRESE.  Matagal nang bumibili ang Kuya ko ng Trese, pero mas pinapansin ko lang kasi ‘yung mga dala niyang Kikomachine. Enero, bago matapos ang bakasyon, nang binasa ko lahat ng Trese rito sa bahay. Hindi ako makatigil noon. Kaya ngayon, isa na ako sa mga nag-aabang ng mga bagong ilalabas nina Budjette Tan at KaJo Baldisimo.
  • Hindi tulad ng mga dati kong listahan, marami-rami ang librong gawang Pinoy sa mga nabasa ko ngayong 2013. Isa ring discovery ang WHAT’S IN YOUR HEART, tipong romance pocketbook na hindi rin naman purong romance. Para ngang YA (young adult), pero college level. Pati na rin ang UNA & MIGUEL, napakatipikal na YA sa puntong lunod na lunod sa cliché (kakaiba at outcast na lead na babae, mala-Zac Efron na lead na lalaki, pagpapanatili sa status quo ng sino ang cool o hindi, atbp.), pero hindi nakauuyam.
  • Ang BET ME naman ang unang romance novel na nabasa ko na overweight ang bida, parang iyong kuwentong Weight . Dahil naman sa ANNA AND THE FRENCH KISS at LOLA AND THE BOY NEXT DOOR (na matagal nang inirerekomenda sa akin ng isa kong kaibigan), lalong tumaas ang standard ko pagdating sa kung ano ang nakakakilig. Ngayong 2014 lalabas ang pangatlo sa serye ni Perkins, Isla and the Happily Ever After.
  • Fan ako ng mga inilalathala ng ADMU press, pero ang sarap ibato ng BABAENG MISTERYOSA sa pagka-sexist/anti-babae. Grabe lang. Hindi rin kapani-paniwala ang motibasyon at pinanggagalingan ng bidang lalaki (na isang chauvinist pig).
  • Saludo ako sa TEMPLO NI TAMILAH at HALINGHING SA HATINGGABI. Marami pang kulang sa banghay (para sa akin) pero magandang erotikang Tagalog ang mga ito (na hindi porno).
  • Magandang huling libro ang REQUIEM para sa Delirium trilogy ni Oliver. Kitang-kita ang pag-mature ng mga bida, politikal din.
  • Nasaan ‘ka mo si Crispin? Nasa SI CRISPIN ni Tony Perez. Naguluhan ako ng kaunti sa ibang mga bahagi nito, pero maganda. Parang ‘yung naranasan ko rin sa pagbabasa ng CLOUD ATLAS.
  • Must read ang SA MGA KUKO NG LIWANAG. ‘Wag mo lang panoorin ang pelikula, basahin mo rin ang nobela.

Bilang kabuuan, gusto ko ‘yung mix ng mga librong nabasa ko para sa taong ito. Maraming YA, marami-rami rin ang local. Kakaunti lang ang classics, pero inaasahan ko namang makahahabol ako sa pagbabasa. Maligayang bagong taon ng pagbabasa!🙂

08.19 Malikmata || Jose Corazon de Jesus

Standard

Malikmata
ni Jose Corazon de Jesus

Pinakamalambot ang tubig sa tingin,
PInakamabait ang kilos ng hangin,
Ngunit hangi’t tubig, kung pagsasamahin,
Kung sa dagat, unos, kung sa langit, dilim.

Ang yantok tingnan mo’t pinakamalambot,
Ipalo mo’t anong pagkagayut-gayot;
Sa mundo ma’t may bagay na susunud-sunod,
Pasusunurin ka, paglatay sa likod.

Ang trumpo’y matigas, may pakong matulis,
Pising sakdal lambot ang nagpapaikit.
Gilingan man naman ay nakagigiik,
Gayong sunuran lang sa tulak ng bisig.

Ang tao ay parang hagdang hinahagdan,
Laging tumatapak saka tinatapakan;
Lupang tuntungan mo, araw-araw–daan,
Masasabi mo bang lupa ang libingan?

Bawa’t isang bagay ayon sa panaho’y 
Tila gumagamit ng pagkakataon.
Saging na nabanggal, nabuwal, gumulong,
May suwi sa tabing bagong sumisibol.

Nagputukan lamang ang bunga ng saga,
Ang binhi’y sumabog sa payat na lupa,
At nang mamatay na ang sagang nawala,
Nabubuhay naman ang sagang napunla.

Bigyan ng pagbigyan, sumunod nang sundin
Ang takbo ng buhay ay di mapipigil.
Katawan ng sawa’y malambot sa tingin.
Kalupit-lupitan kung tayo’y lingkisin.

Ang lupa, mabait; bulkan kung pumutok;
Ang tubig, mabait; pagbaha, panlunod;
Ang apoy, mabait; pagsiga, panunog–
Itong buong mundo pala’y gawang salot.

Hali-halili lang ang anyo ng bagay
At hali-halili ang tingkad ng kulay;
Kay rami ng ating inapi’t utusang
Sa paghihiganti — bukas sila naman.

1927

Dahil hindi lang naman Pag-ibig ang isinulat na tula ni Jose Corazon de Jesus.😉

08.18 304 || Emmanuel Lacaba

Standard

304
ni Emmanuel Lacaba

Who has loved the storm with an innocent love.
Umibig sa bagyo ang kaloobang walang
Muwang. Ngayong nabuklat na ang karimlan

Ipakimulat akong muli sa liwanag.
Kung wala akong ginawa kundi humingi
Di ko naman mauutusan ka

O sinuman sa katulad kong mga nilalang
Mo, mga pangarap ng iyong diwa lamang.
The fire of humiliation I’m learning to stand

Ngunit di ang pagkakataóng tadhâ na.
Sa iyo, Maykapal,
At sa buhawi’t lindol ang masasabi ko lang

Ay nasa iyo iyon, kung siya mong nasa,
Gayong nais ko’y ligaya naman.
Sana’y sabihin mong sabi mo e;

Subalit di ako namimilit, di
Nakikiusap; magsisikap lamang na unawain
Ka’t aking sarili, sariling

Dili-dili mo rin. Ewan kung kaya ko nang
Isipin ang kamatayang tulad marahil
Ng pagkatulog, bagong buhay; nasa

Iyo iyon; pinag-aaralan kong
Makisama sa iyong bait-samâ,
Bathala, Allah, Eli, Eri Eri,

Pagkat halu-halo rin ako’t
Tulad ng puso ng araw, dagat, aso’t gamugamo’y
Halaw din sa iyo.

*mula sa Salvaged Poems, © 1986, 2000

08.17 Tamang asal ng paglimot || Reagan R. Maiquez

Standard

Tamang asal ng paglimot
ni Reagan R. Maiquez

Ang lahat ng basura ay palitan ng isang salita na malalaman mo mamaya

Bawal magtapon ng BASURA rito

Ilagay ang BASURA sa tamang lalagyan, dito ang nabubulok at dito ang di nabubulok

Munting BASURA, Ibulsa muna

BASURANG Itinapon mo babalik at babalik sa iyo

May Pera sa BASURA

Ngayon, narito ang salitang ipapalit mo sa basura: ALAALA

Gawin nga natin,

Bawal magtapon ng alaala rito

Ilagay ang alaala sa tamang lalagyan, dito ang nabubulok at dito ang di nabubulok

Munting alaala ibulsa muna

Alaalang itinapon mo babalik at babalik sa iyo

May pera sa alaala

Ngayon, alamin nga natin ang pagkakaiba ng dalawa

Na para bang may gusto kang itapon

Na alam na alam mong dati’y napakahalaga.

Na para bang ang basura ay isa ring alaala

At ang alaala ay maaari ring mga basura.

*kabilang sa kalipunan ng mga tula ni Reagan R. Maiquez na nagkamit ng Unang Gantimpala sa Palanca, Tula 2009